Wiso alemannisch
Weles esch dia schönst sprooch?
Äs esch d mainig fom autor, dass än objektifi antwort nid mögli esch uf dia froog. Mer chönnt allwäg frooga, weli (frömd) sprooch am aifachsta isch zom leera, odr weli dass am gäbista ond chürzista wüssaschaftlichi fakte cha beschryba. Ond wia chammr poesy ond lürik i ferschidnige sprooche ferglycha?
Mer chönnt au d schrifte aluaga. Aini met wenig umluut isch praktischer, aini mit filne isch ästetischer. Bruucht ä schrift feli schryb regle zom präzys z sy?
All dia frooge praiched nid da chärn fo dä froog. D schönhait lyd im aug fom aluagr, sy cha numa subjektif beantwortet wärda. Ond weles esch ä zualässigi subjektifi antwort? Da chly prinz bim Saint-Exupéry (“Le Petit Prince”, Antoine de Saint-Exupéry, 1945) hed ä schöni roosa, mos abr usagfinda, dass sy objektif agluagt nid ainzigartig isch. Erscht d fertruuthait macht syni bluama speziell. Dia antwort, au wenn sy nid chönnt subjektifer sy, isch global gültig.
Aso, weles esch dia schönst sprooch? dia aignig!
S Zyl